FAQ

Kiko VotaAruba ta?
Riba 22 di september 2017 Aruba tin su eleccion politico.
VotaAruba ta un herment di internet cu ta bisa su usador, despues cu ela duna su opinion tocante diferente topiconan, cua partido politico e tin mas en comun cune. Na cada ponencia, y riba e pagina di resultado e usador por orienta ampliamente riba e punto di bista di tur partido.
Ken a traha VotaAruba?
VotaAruba ta traha door di Fuente, un grupo di hoben Arubiano cu ta traha of studia na Hulanda. Fuente ta un plataforma cu ta duna espacio pa comparti informacion tocante di Aruba, pa propone solucionnan y presenta ideanan. E contenido aki riba ta basa riba hecho y ta semper constructivo. Fuente no ta afilia cu ningun partido politico. E focus di Fuente ta e bienestar di nos isla. Tur hende por contribui. Fuente ta uza e metodo di StemWijzer, e prome guia electoral cu a ser desaroya door di ProDemos - Cas di democracia y estado di derecho. ProDemos ta un fundacion independiente y imparcial cu e meta pa informa hende tocante e estado democratico.

Partnernan cu a sostene Fuente den e initiativa aki: Den Cayente, ECA Communication Group, Wolff Independents, Kamer van Koophandel, Universidad di Aruba, y VotaConsciente.com.
Con e topiconan y ponencianan a ser scogi?
E redaccion di VotaAruba a scoge topiconan cu ta haya hopi atencion den politica y campaña na e momentonan aki. Cu e informacion aki nan a traha un lista di ochenta ponencia. Tur partido politico a haya e lista aki den luna di juli 2017. Pa cada ponencia, e partidonan ta indica si nan ta di acuerdo, no di acuerdo, of si nan ta tuma un posicion neutral. Despues, VotaAruba a selecta 30 ponencia pa inclui den e lista final. Un criterio importante pa seleccion di e lista ta e diversidad di contesta di partidonan: si hopi partido tin e mesun punto di bista tocante un topico, e ponencia aki ta menos interesante y menos util pa VotaAruba.

E redaccion ta aspira pa construi ponencia cu ta cla y objetivo. Redaccion tambe a percura pa uza terminonan simpel.
Cua partidonan ta inclui den VotaAruba?
Tur partido cu ta participa den e eleccion di september 2017 y a opta pa participa den VotaAruba 2017. E partidonan, den orden alfabetico, ta: AVP, CURPA, MAS, MEP, POR, PPA, RAIZ y RED.
Dicon tin un pantaya pa ‘Selecta partido’?
VotaAruba no ta un ‘black box’ cu ta bisa bo pa ken bo tin cu vota. VotaAruba ta un herment educativo cu ta yuda door di duna bo un comparacion entre e puntonan di bista di cada partido, y bo mes un posicion. Abo mes ta selecta bo preferencia pa cada ponencia, bo por indica cua ponencia bo ta haya extra importante, y tambe cua partido bo kier inclui den e resultado. Bo por opta pa inclui tur partido, pero tin hende lo prefera pa compara solamente algun partido cu otro, of kier sa mas tocante e opinion di e partidonan nobo. Pesey abo mes por selecta cua partido (minimo 3) bo kier inclui den bo resultado.
Dicon mi unico opcionnan ta ‘di acuerdo’, ‘no di acuerdo’ y ‘ningun di dos’?
VotaAruba ta duna e opcionnan aki, pasobra esakinan ta e manera mas cla pa duna bo preferencia. Ademas esaki ta e mesun manera cu decisionnan ta wordo tuma den nos democracia. Na e mesun manera aki, nos parlamentarionan por vota pa of contra un ley of mocion. Den VotaAruba, e usuario por indica cua topiconan e ta haya mas imporante cu e otronan despues di contesta tur ponencia, den e pantaya ‘Extra importante”.
Con mi por interpreta e resultado?
Den e pantaya di resultado bo por mira e 3 partidonan cu tin mas en comun cu bo punto di bista. E posicion mas halto riba e lista ta e partido cu tin mas similaridad den respuesta. Den e siguiente pantaya bo por mira e percentahe di similaridad. Bo por uza e pantaya aki pa explora bo resultadonan: cu e botonnan “Compara partido” y “Compara ponencia” bo por explora y compara e diferente opinionnan. Akinan tambe bo por lesa e clarificacion di e partidonan, evalua bo topiconan ‘extra importante’ criticamente, y modifica bo respuestanan y mira kico e consecuencia ta pa bo resultado.
Si mi contesta tur ponencia lihe lihe, of mi contesta tur ponencia ‘di acuerdo’ of ‘no di acuerdo’, mi ta haya e notificacion cu mi no duna suficience contesta serio. Dicon?
VotaAruba ta invita bo pa pensa criticamente tocante e topiconan cu nos ta presenta. Pesei nos no ta acepta contestanan pura. Ademas, si bo duna e mesun contesta na tur ponencia, nos no por saca un resultado serio. VotaAruba ta consisti di ponencianan contradictorio: si bo ta di acuerdo cu ponencia A, ta logico cu bo lo ta desacuerdo cu ponencia B. Ningun partido a duna e mesun contesta na tur ponencia. Si bo mes kier descubri e metodo di VotaAruba, bo por compara bo opinion cu esun di e partidonan den e pantaya di resultado.
Dicon mi resultado ta dunami e partido ‘robes’?
VotaAruba ta uza 30 ponencia pa identifica cu cua partido abo tin mas en comun tocante diferente topico actual den nos eleccion. Pesei ta posibel cu bo resultado ta indica un partido cu bo no a spera. Aparentemente toch bo tin hopi en comun cu e partido aki, ora nos compara bo opinionnan tocante topico cu ta relevante actualmente.

Si bo a haya un resultado inespera, ta consehabel pa bo wak bon cua ponencianan bo a contesta mescos (y diferente!) cu e partido. Podise esaki ta pone bo pensa un tiki mas prome cu bo scohe bo partido politico.
Kico mi mester contesta si mi ta di acuerdo cu un ponencia bou di algun condicion?
Na e momento aki bo por consulta e clarificacion cu e partidonan ta duna. Si tin mester, bo por contesta ‘Ningun di dos’. Esaki ta depende completamente n’abo, y na e importancia cu bo ta duna e condicionnan.
Ken a paga pa VotaAruba?
Fuente ta un fundacion nonprofit. VotaAruba a wordo realisa cu e sosten financiero di empresanan local: Aruba Bank, Aviation Security Worldwide, De Palm Tours, Fantastic Gardens, Guardian Group, HBN Law, Inarch, Setar, y Papiamento Restaurant.

Tambe nos tin algun sponsors cu a indica nan preferencia pa no wordo menciona den publicidad. Tanto e redaccion di VotaAruba como ProDemos ta na altura di e identidad di e sponsornan aki.

Ningun sponsor a influencia e proceso of contenido di VotaAruba na ningun manera.
No tin un app di VotaAruba?
No, no tin un app. Awendia nos por uza ‘responsive websites’ cu ta duna bo acceso na VotaAruba por medio di bo computer, tablet of smartphone facilmente.
VotaAruba ta activo riba rednan social?
Sigur cu si. Bo por haya VotaAruba riba Facebook y Twitter.
Y con ta para cu mi privacidad?
Bo privacidad ta protehi den concordancia cu leynan internacional. Bo por haya tur informacion tocante e informacion cu VotaAruba ta colecta den nos Aviso di Privacidad (Privacy Statement).
Tin topiconan importante cu ta falta den e lista di ponencia. Dicon?
VotaAruba ta busca topiconan distintivo cu ta refleha diferencianan (grandi) di opinion entre e partidonan. Tin algun ponencia cu casi tur partido ta faborece. Pasobra e partidonan ta pensa mescos tocante e topiconan aki, nan no ta produci diferencianan cla y nos no por haci un distincion entre nan. Pa e motibo aki tin algun topico importante (manera seguridad y medio ambiente) cu no ta wordo trata den e lista di ponencia di VotaAruba.
Partidonan por cambia nan contesta riba un ponencia?
Nos maneho ta cu partido semper mester por demostra cu e contesta ta contradici nan programa politico of un otro comunicacion oficial. Tambe den caso di discrepancia entre un clarificacion y nan contesta, e contesta por wordo cambia.

Esaki semper lo tuma lugar den consulta cu ProDemos, pero en principio VotaAruba no lo zomaar bai di acuerdo cu peticionnan pa hasi un cambio. Si cambio ta wordo hasi, esaki lo wordo anuncia riba e rednan social di VotaAruba.

Otro cambiononan cu ta posibel ta logonan nobo of ekiboca, links, error ortografico, of clarificacion adicional (pa ponencia cu no tawatin clarificacion prome).
Cu cua browsers y operating systems mi por uza VotaAruba?
VotaAruba ta construi pa funciona optimalmente cu: Desktop browsers Explorer 11, Edge, Safari 9.0, Chrome 46, Firefox 41, Mobile browsers: Chrome y Safari (IOS9+). Si bo habri VotaAruba den un otro browser, por pasa cu e no ta functiona optimalmente. Si VotaAruba no ta traha bon, bo por purba habrie den un otro browser. Si esaki no ta traha, por fabor tuma contacto cu nos.
Mi pregunta no ta den e lista aki. Ken mi por puntra?
Bo por manda nos bo pregunta via Facebook of info@nosfuente.org. Masha danki!